FILIMONI

Faulo yana kiluma Filimoni 'waineye.

Filimoni tomogo 'ai'aiwabuna, wata taunina tovetumagana 'awalawa Kolose 'waineye.Filimoninina tamu tomogo i 'ewai yana tofolova-maimaiga 'ana wagava Onesimo mulieta i dega 'ana toveimeanina 'wainega. I dega i nunagoga Faulo i veluagai tutuyanina i miamia vanuga 'eba yogona 'waineye. Faulo yana veifufu 'wainega Onesimo i nuavilai Iesu Keliso 'waineye.

Faulo wata Onesimo taiadi i miamia nuanuana Onesimo i na vevilai bega de'e letanina i kilumi Filimoni faifaina. Letanina nageneye Faulo Filimoni i vonevoneni nuanuana Onesimo i na lu'uma'umaieni ma yana sosoana. I na lu'uma'umaieniga kebu yana tofolova-maimaiga faifaina siwe fai ma fuedie i vetumagana Iesu Keliso 'waineye faifaina. De'e letanina 'ana 'idi side bani'odi.

Faulo yana vekaiwa Filimoni 'waineye. 1:1-3

Faulo i vekaiwa Yaubada 'waineye Filimoni faifaina. 1:4-7

Faulo nuanuana Filimoni Onesimo i na sosoaneni. 1:8-22

Faulo yana 'alanuai. 1:23-25

Philemon

1 Yau Faulo iada Timoti taiadi, 'a vevekaiwa iama Filimoni 'waimuye. 'Omu wata 'ima ma fueda ta lulu'ivona Iesu Keliso Valana 'Atumaina faifaina, begaidi yau i yatoku a miamia vanuga 'eba yogona 'waineye. 2 Wata yama vekaiwa i viwai Iesu 'ana tovetumaganavo 'waidie, kumanidiavo taiadi 'wa mimiava'auta yamu vanuge, Afia kumanidi 'a awave-novunediga wata Akifasi. Taunina ma fueda ta vetolugavia Iesu Keliso faifaina. 3 'A vevelu'ui faifaimi, nuanuaku Yaubada Tamada wata 'ada Toveimea Iesu Keliso ma yadi nuakalikali i na vevesauluva 'atumaina 'waimie wata nuanua bikana mia 'atumaina taiadi i na velevelemi.

Filimoni yana nuakalikali wata yana vetumagana faifaidi.

4 Valamu a nogai 'u vevetumagana 'ada Toveimea Iesu 'waineye wata Yaubada yana tomotoga 'u nunuakalikaliedi, begaidi tutuyanina a vevelu'ui Yaubada 'waineye a nuanuanimu wata a vevekaiwa 'waineye faifaimu. 6 A vevelu'ui faifaimu, nuanuaku Yaubada yana 'aivaita 'wainega tutuya fuedi yamu vetumagana Iesu Keliso 'waineye 'u na lulu'ivona tomotoga 'waidie, bega naninidi 'atumaidi ta veveluagadiga fai 'ida Keliso yana tomotoga, 'u na 'aseta-'atumaidi. 7 Iaku, 'eba sosoana bwaikina wata 'eba 'aivaita mogitana 'waikuye fai 'u nunuakalikali bwaikina, we'e yamu veifufu 'waidiega Yaubada yana tomotoga 'u kiavefa'alidi wata 'u kiavesosoanidi.

S4 Lom 1:8-9S6 Kolos 1:9

Faulo yana velu'ase'ase Onesimo faifaina.

8 Yaubada yana tomotoga 'u nunuakalikaliediga begaidi a na vonemu. Yau Faulo, Iesu Keliso faifaina a vetomata'aulele a lulu'ivoneyeni vanuga 'eba yogona 'waineye i yatoku a miamia, ma yaku veimea Keliso 'wainega bega 'aku fata a da lukakademu yaku nuanua 'u da 'idewai, siwe fai 'omu iaku, nuakalikaliega a na vonemumo bega ava'ai sauluvaga 'atumaina, nuanuaku 'u na 'idewai. 10 Nuanuaku a na vonemu Onesimo faifaina, de'e bei vanuga 'eba yogona 'waineye a miamia yaku veifufu 'wainega i vetumagana Keliso 'waineye bega a awave-natuna 'waineye. 11 Basenadi Onesimo yamu tofolova-maimaiga, 'omu 'aisemu 'u veimea-'ea'ea 'waineye, yana folova kebu 'atumainaga i dega 'waimuyega. I maiga a veluagai bega tutuya de'e tomogo 'atumaina 'waideye, 'omu wata yau 'ada to'aivaita.

12 A nuakalikalieni bwaikina igodi a da ve'o'oleni. Yau a miamia vanuga 'eba yogona 'waineye fai Iesu Valana 'Atumaina a lalau'age, we'e Onesimo tutulimu i da 'i'ivaiseku, siwe 'omu yamu tofolova bega a voneni i na vilai i na wai. 14 'Ai'edi 'u na vo, Onesimo a na vevilai i na nago Faulo i na 'i'ivaiseni,” 'atumaina, siwe kebu a na lukakademuga, 'ai'edi nuanuamu taunimu yamu nuanuayega 'u na vetunei. 'Ai'edi kebu, 'asa'aiana.

15 I 'iawemuga voke tutuya 'ale'usana faifaina, bega tutuya de'e taiadi 'wa na mia-vagata. 16 Mogitana yamu tofolova, siwe 'asiau kebu tofolova 'aisena, taunina tamu tomogo, fai ma fueda ta vetumagana Keliso 'waineye bega ta na awave-taineni. Yau a nuakalikalieniga, 'omu wata bani'odi 'u na nuakalikalieni bwaikina fai ma fuemie 'ada Toveimea Iesu yana tomotoga bega i na 'i'ivaisemu yamu folova 'waidie.

17 'Ai'edi 'omu 'aku 'au taiadi ta folofolova Iesu faifaina, 'u na nuanina bega Onesimo i na waiga 'waimuye ma yamu sosoana 'u na lu'uma'umaieni 'wa da vo yau a da le'wa 'waimuye 'u da lu'uma'umaieku. 18 We'e 'ai'edi tamu ava'ai sakoina basenadi i 'idewaiga 'waimuye, 'alo tamu nani i 'ewa-maimaigi 'u na voneku a na tutuli. 19 Yau Faulo, de'e a kilukiluma nimakuyega, 'u na 'isa'inanai 'u na 'asetai mogitana yau, bega a vona'awaufaufa 'waimuye 'ai'edi ava'ai Onesimo i 'ewa-maimaigiga 'waimuyega, matatabuna yau a na tutulidi. Siwe 'u na nuani basenadi yaku vona 'wainega 'u vetumagana Keliso 'waineye mia 'atumaina wata miamia-vagaina 'u veluagai, 'ako 'u da vo, A na tutuli,” kebu 'amu fataga. 20 Begaidi nuanuaku 'u na vesauluva 'atumaina 'waikuye 'ada Toveimea Iesu faifaina. 'Omu bani'odi taiku fai ta vetumagana Keliso 'waineye bega 'ai'edi yaku nuanuananina 'u na 'idewaiga, 'u na kiavesosoaniku. 21 A 'asetai mogitana 'ai'edi ava'ai nuanuaku faifaina a na kiluma 'waimuye 'ana fata 'u na 'idewai, siwe kebu naninina 'aisena, nani 'ifwaidi wata 'atumaidi taiadi.

22 Wata tamu yaku nuanua, nuanuaku yamu vanuge yaku 'eba 'eno 'u na 'idewai, fai a nuani mogitana yami velu'ui 'waidiega Yaubada bonami i na nogai bega i na 'etoyavuku vanuga 'eba yogona 'wainega a na wai.

S10 Kolos 4:9S14 2 Kol 9:7S19 Gal 6:11S22 Fil 1:25

'Alanuai.

23 Efafila, taunina wata Iesu Keliso faifaina i lulu'ivona bega ma fuemeye 'a miamia vanuga 'eba yogona 'waineye, yana vekaiwa i vetunei 'waimie. 24 Wata 'ifwaidi tomotoga yadi vekaiwa 'waimie, taunidi 'aku to'aivaita taiadi 'a folofolova, Malika, Alisitako, Dimasi wata Luke.

25 A vevelu'ui faifaimi, nuanuaku 'ada Toveimea Iesu Keliso ma yana nuakalikali i na vevesauluva 'atumaina 'waimie.

S23 Kolos 1:7; 4:12S24 Kolos 4:10 2 Tim 4:10-11 Fol 16:10

'Asa'aiana bani'odi,

Yau Faulo.